Válljejuvvon live-čuojahanbarggut
DJ iDJa čuojaha elektronalaš musihka masa sáhttá dánsut muhto su ovdanbuktimis gullojit maiddái bihtát gos geahččaladdá gávdnat eará musihkkahámiid. Vuolggasadji dán oktavuođas leat su jietnabáddemat sámi luonddus maiguin son eksperimentere ovdanbuktimis lávddi alde. Ná muitala artistta:
Mu dáiddalaš vuolggasadji lea luondu ja mo dat nuoskiduvvo ja billistuvvo Sámis ja eará guovlluin máilmmis. Danin geavahan iežan jietnabáddemiid maid lean dahkan luonddus. Daid geavahan de iežan ovdanbuktimis lávddi alde. Lávddi alde geavahan iešguđetge teknihkalaš vugiid mat botnjet jienaid ja hui dávjá oččot jienat dakkár dramatihkalaš hámi. Mun háliidan dakko bokte láhčet saji nu ahte guldaleaddji ieš sáhtašii čiekŋudit iežas oktavuođa iežas dálá dillái ja dakko bokte addit vejolašvuođa reflekteret ja smiehttat mo máilmmi dilli duođaige lea. Mu iežan ovdanbuktimat bohtet alo varieret nu ahte loahpa loahpas lea olbmuid duohken dulkot ja gieđahallat muitogovaid ja dieinna lágiin buktit ipmárdusa dasa maid leat gullan.
Jos háliidat ipmirdit stiilla maid DJ iDJa ovdanbuktá live artistan de berret iskkat dáid bihtáid:
Čuojahanbargu Gardenis Eriksmålas (Ruoŧas, 2023)
Geassit 2023 galledii DJ iDJa ovtta ávdin giláža Lulli-Sámis. Tennvatn, mii lea Sørfold gielddas, bázii ávdimin 1970/80 logus ráđđehusa guovdduštanpolitihka dihte. DJ iDJa galledii giláža gos orui golbma beaivve dan botta go báddi luonddu jienaid jogažiin, divrriin, elliin ja meahcis. DJ iDJa lea rievdadan jietnabáddemiid maid dagai Sørfoldas live ambient hápmái. Son čuojahii dán bihtá vuosttaš geardde Gardenis (Eriksmålas Ruoŧas) 2023 geasi. Loga eanet dán ovdanbuktima birra dáppe.
Dáppe oainnát olles ovdanbuktima:
Live konsearta ambient šáŋŋeris London gullevaš «Threads» rádiostašuvnnas (2023)
Lávvardaga cuoŋománu 1. beaivve 2023 lei DJ iDJa mielde njuolgga London gullevaš THREADS rádiostašuvnnas sierralágan musihkkabihtáin ambient šáŋŋeris mii bisti diimmu. Ovttas suinna lei maiddái dánska artista Koviljka Københápmanis eret. Soai leigga ovdal ovttas dahkan jietnačájálmasa mii doaimmai dego inspirašuvdnan THREADS rádiostašuvnna ovdanbuktimii.
Dáhpáhus streamejuvvui njuolgga beakkálmas «Funkhaus» visttis Berliinnas ja lei boađus ovttasbarggus gaskal THREADS, Berliinna gullevaš Etikett rádiostašuvnna ja guokte bealátkeahtes kollektiiva: Field Conspiracy ja FOAD.
Vulobealde gávnnat jietna- ja video báddemiid dien dáhpáhusas:
Jienat:
Video:
Spatial Sound ovdanbuktin, Berliinnas (2023)
Jietnačájálmas «Artifical Relation To Nature» čájehuvvui vuosttaš geardde Spatial Sound Festiválas Berliinnas njukčamánus 2023.
Bihtás čuojahii DJ iDJa ovttas dánska jietnadáiddáriin Koviljkain eret Københápmanis. Festiválas ovdanbuvttiiga soai almmolaččat vuosttaš geardde dán bihttá mii oaččui buorre responssa.
Vulobealde gávnnat sihke jietna- ja videobáddema dán čájálmasas. Ii atte nu buori vásáhusa go maid 8-kanála jietnasystema attášii muhto liikká oaččut muhtunlágan muitogova atmosfearas mii lei dán čájálmasas.
Jienat:
Video (dás oainnát 10-minuhta guhkkosaš video čájálmasas):
... ja dán videos muitala DJ iDJa bihtá višuvnna birra:
«Performance Class» bádden Berliinnas (2023)
DJ iDJa lea studeren elektronalaš musihkkabuvttadeame ja ovdanbuktima Berliinnas. Dán jagi miel lea son bargan ovdánahttit iežas stiilla skuvlla oadjebas birrasis. Dán báddemis, ovtta luohká sešuvnnas, geahččalattai artista geavahit iešguđetlágan musihkka reaidduid ovtta konseartabihtá ovdanbuktimis. Dás son maid geavahii sámi slampoehta Ida Benonisena jiena (Ida lea addán sutnje lobi nu dahkat).